រថក្រោះ​អ៊ីស្រាអែល​ទម្លាយ​ចូល​តំបន់​ភាគ​ខាងជើង និង​ខាងត្បូង​ហ្គាហ្សា

 ប្រភព៖ Reuters

គែរ៖ កាលពីថ្ងៃអាទិត្យ កងកម្លាំងអ៊ីស្រាអែលបានទម្លាយចូលទៅក្នុងសង្កាត់ Shejaiya ភាគខាងជើងតំបន់ Gaza Strip ហើយក៏បានចូលទៅដល់ភាគខាងលិច និងកណ្តាលនៃទីក្រុង Rafah ផងដែរ ដោយបានសម្លាប់ជនជាតិប៉ាឡេស្ទីនយ៉ាងតិច ៦នាក់ និងបំផ្លាញផ្ទះសម្បែងជាច្រើនខ្នង។

ជាងប្រាំបីខែបន្ទាប់ពីសង្រ្គាមផ្លូវអាកាស និងដីគោករបស់អ៊ីស្រាអែលនៅហ្គាហ្សា ក្រុមសកម្មប្រយុទ្ធហាម៉ាស់នៅតែបន្តអាចវាយបកនៅក្នុងតំបន់ដែលសន្មតថា ស្ថិតនៅក្រោមការគ្រប់គ្រងរបស់អ៊ីស្រាអែល។

កិច្ចខិតខំប្រឹងប្រែងរបស់អ្នកសម្រុះសម្រួលអារ៉ាប់ ដែលគាំទ្រដោយសហរដ្ឋអាមេរិក មិនទាន់ទទួលបានជោគជ័យក្នុងការធានាបទឈប់បាញ់នោះទេ។ ក្រុមហាម៉ាស់ទាមទារឱ្យបញ្ចប់សង្គ្រាម និងការដកទ័ពអ៊ីស្រាអែលទាំងស្រុងចេញពីតំបន់ហ្គាហ្សា ខណៈដែលអ៊ីស្រាអែលទទូចឱ្យផ្អាកបណ្តោះអាសន្នក្នុងការប្រយុទ្ធរហូតដល់ក្រុមហាម៉ាស់ត្រូវបានលុបបំបាត់។

យោធាអ៊ីស្រាអែលអះអាងថា នៅក្នុងសង្កាត់ Shejaiya ខ្មាន់កាំភ្លើងប៉ាឡេស្ទីនជាច្រើននាក់ត្រូវបានសម្លាប់ អាវុធត្រូវបានរកឃើញ ហើយហេដ្ឋារចនាសម្ព័ន្ធយោធាត្រូវបានគេកំណត់គោលដៅ។

អ្នកស្រុកបាននិយាយថា រថក្រោះរបស់អ៊ីស្រាអែល ដែលបានត្រឡប់ទៅកាន់សង្កាត់ Shejaiya កាលពីបួនថ្ងៃមុន បានបាញ់គ្រាប់ផ្លោងដាក់ផ្ទះជាច្រើនខ្នង ដែលធ្វើឱ្យគ្រួសារទាំងនោះជាប់គាំងនៅខាងក្នុង និងមិនអាចចាកចេញបាន៕