កូរ៉េ​ខាង​ជើង​៖ ការបញ្ជូនទាហានទៅជួយរុស្ស៊ី គឺស្របច្បាប់អន្តរជាតិ

 ប្រភព៖ Reuters

ព្យុងយ៉ាង៖ កូរ៉េខាងជើងបាននិយាយកាលពីថ្ងៃសុក្រថា ការផ្លាស់ប្តូរណាមួយក្នុងការបញ្ជូនកងកម្លាំងរបស់ខ្លួនទៅជួយរុស្ស៊ី ក្នុងសង្គ្រាមនៅអ៊ុយក្រែននឹងស្របទៅនឹងច្បាប់អន្តរជាតិ ទោះបីជាខ្លួនមិនបានបញ្ជាក់ពីការដាក់ពង្រាយបែបនេះនឹងកើតឡើងក៏ដោយ។

នៅក្នុងសេចក្តីថ្លែងការណ៍ដែលធ្វើឡើង ដោយទីភ្នាក់ងារសារព័ត៌មាន KCNA របស់កូរ៉េខាងជើង អនុរដ្ឋមន្រ្តីការបរទេសកូរ៉េខាងជើង លោក Kim Jong-gyu បាននិយាយថា ក្រសួងការបរទេស មិនមានការពាក់ព័ន្ធដោយផ្ទាល់នៅក្នុងបញ្ហា ដែលដោះស្រាយដោយក្រសួងការពារជាតិទេ ដូច្នេះលោកមិនអាចធ្វើអត្ថាធិប្បាយលើការដាក់ពង្រាយណាមួយបានទេ។

ទោះជាយ៉ាងណាក៏ដោយ លោកបានបន្ថែមថា «ប្រសិនបើមានរឿងបែបនេះមែន ដូចអ្វីដែលប្រព័ន្ធផ្សព្វផ្សាយពិភពលោកកំពុងនិយាយ ខ្ញុំគិតថាវាជាទង្វើដែលអនុលោមតាមវិធាននៃច្បាប់អន្តរជាតិ»។

អ៊ុយក្រែន សហរដ្ឋអាមេរិក និងសម្ព័ន្ធមិត្តលោកខាងលិចផ្សេងទៀតនិយាយថា ពួកគេមានភស្តុតាងដែលថាក្រុងព្យុងយ៉ាងបានបញ្ជូនទាហានរាប់ពាន់នាក់ទៅកាន់ប្រទេសរុស្ស៊ីសម្រាប់ការដាក់ពង្រាយក្នុងសង្គ្រាមប្រឆាំងនឹងអ៊ុយក្រែន។

កន្លងមក ទីក្រុងព្យុងយ៉ាង និងវិមានក្រឹមឡាំងបានច្រានចោលរបាយការណ៍បែបនេះថាជាពាក្យចចាមអារ៉ាមគ្មានមូលដ្ឋាន។ ប៉ុន្តែ​នៅពេល​សួរ​អំពី​របាយការណ៍​កាលពី​ថ្ងៃ​ព្រហស្បតិ៍ ប្រធានាធិបតី​រុស្ស៊ី លោក វ្ល៉ា​ឌី​មៀ ពូ​ទីន មិនបាន​បដិសេធ​ទាំងស្រុងទេ​។

អ៊ុយក្រែននិយាយថា ការចូលរួមរបស់កូរ៉េខាងជើងនៅក្នុងសង្រ្គាមដែលបានចាប់ផ្តើមជាមួយនឹងការឈ្លានពានពេញលេញរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២ អាចជាឧក្រិដ្ឋកម្មនៃការឈ្លានពានក្រោមច្បាប់អន្តរជាតិ។

បើយោងតាមសមាជិកសភាកូរ៉េខាងត្បូង មានកងទ័ពកូរ៉េខាងជើងប្រហែល ៣,០០០នាក់ត្រូវបានបញ្ជូនទៅរុស្ស៉ី ហើយនឹងមានផែនការបន្ថែមទៀតនាពេលអនាគត៕