ក្រុមអង្គរក្សរបស់អនុប្រធានាធិបតីហ្វីលីពីន ត្រូវបានផ្លាស់ប្តូរ ខណៈពេលមានការស៊ើបអង្កេត

 ប្រភព៖ Reuters

ម៉ានីល៖ ក្រុមអង្គរក្សរបស់អនុប្រធានាធិបតីហ្វីលីពីន លោកស្រី Sara Duterte ត្រូវបានផ្លាស់ប្តូរចេញ បន្ទាប់ពីក្រសួងយុត្តិធម៌ បើកការស៊ើបអង្កេតលើការគំរាមកំហែងសម្លាប់ ដែលលោកស្រីបានធ្វើប្រឆាំងនឹងប្រធានាធិបតី Ferdinand Marcos Jr។

កងកម្លាំងសន្តិសុខហ្វីលីពីនបាននិយាយនៅថ្ងៃពុធនេះថា ការផ្លាស់ប្តូរអង្គរក្ស និងការស៊ើបអង្កេតនេះ បង្ហាញពីភាពតានតឹងផ្នែកនយោបាយ នៅហ្វីលីពីន និងបង្កើនការព្រួយបារម្ភអំពីស្ថិរភាពនៃរដ្ឋាភិបាល។

អ្នកនាំពាក្យប៉ូលិសនិងយោធា បានបញ្ជាក់ថា ការផ្លាស់ប្តូរអង្គរក្ស គឺពាក់ព័ន្ធនឹងការស៊ើបអង្កេតដាច់ដោយឡែកមួយ ទាក់ទងនឹងការចោទប្រកាន់ថា លោកស្រី Duterte បានប្រើឥទ្ធិពលរបស់ខ្លួន ក្នុងការផ្ទេរប្រធានបុគ្គលិករបស់លោកស្រី ដែលកំពុងជាប់ឃុំ។

អ្នកនាំពាក្យប៉ូលិសជាតិ វរសេនីយ៍ឯក Jean Fajardo បានប្រាប់អ្នកសារព័ត៌មានថា «វេជ្ជបណ្ឌិតប៉ូលិសម្នាក់ ត្រូវបានរុញដោយប្រធានសន្តិសុខរបស់លោកស្រី Duterte ហើយ យើងមិនអាចអនុញ្ញាតឱ្យរឿងនេះកន្លងផុតទៅបានទេ»។

ក្រសួងយុត្តិធម៌ ក៏បានកោះហៅលោកស្រី Duterte ឱ្យចូលបង្ហាញខ្លួន ក្នុងការស៊ើបអង្កេត ជុំវិញការគំរាមកំហែងសម្លាប់លោក Marcos ដែលលោកស្រីបានធ្វើកាលពីថ្ងៃសៅរ៍ផងដែរ។ លោកស្រី Duterte បានអះអាងថា លោកស្រីបានណែនាំឱ្យឃាតកម្នាក់ សម្លាប់លោក Marcos ប្រសិនបើលោកស្រីត្រូវបានគេសម្លាប់។ ក្រោយមក លោកស្រីបានបដិសេធថា វាមិនមែនជាការគំរាមកំហែងនោះទេ។

ការគំរាមកំហែង និងការស៊ើបអង្កេតនេះ បានបង្កជម្លោះរវាងលោក Marcos និងលោកស្រី Duterte ដែលធ្លាប់ជាសម្ព័ន្ធមិត្តនយោបាយ។ លោក Marcos បានប្តេជ្ញាចាត់វិធានការ ប្រឆាំងនឹងការគំរាមកំហែងនេះ៕