ជប៉ុន ផ្តល់ជំនួយសន្តិសុខដែលមានតម្លៃជិត ១១ លានដុល្លារដល់ហ្វីលីពីន

 ប្រភព៖ Reuters

ម៉ានីល៖ ជប៉ុន និងហ្វីលីពីន នៅថ្ងៃព្រហស្បតិ៍នេះ បានចុះហត្ថលេខាលើកិច្ចព្រមព្រៀងជំនួយសន្តិសុខមួយ ដែលមានតម្លៃជិត ១១លានដុល្លារ ដើម្បីជួយឱ្យហ្វីលីពីន បង្កើនសមត្ថភាពការពារជាតិ និងឃ្លាំមើលដែនសមុទ្រ។

កាល​ពី​ខែ​កក្កដា ហ្វីលីពីន និង​ជប៉ុន​បាន​ចុះ​ហត្ថលេខា​លើ​កតិកាសញ្ញា​យោធា​ដ៏​សំខាន់​មួយ​ ដែល​អនុញ្ញាត​ឲ្យ​មាន​ការ​ដាក់​ពង្រាយ​កម្លាំង​នៅ​លើ​ដី​របស់​គ្នា​ទៅ​វិញ​ទៅ​មក ដោយ​ធ្វើ​ឲ្យ​កិច្ច​សហប្រតិបត្តិការ​យោធា​រវាង​ប្រទេស​ទាំង​ពីរ​ កាន់តែមាន​ភាព​រលូន។ ជប៉ុន​មិនមាន​ការទាមទារ​ចំពោះ​សមុទ្រ​ចិន​ខាងត្បូង​ទេ ប៉ុន្តែ​មាន​ជម្លោះ​ដែនសមុទ្រ​ដាច់ដោយឡែក​ជាមួយ​ចិន​នៅ​សមុទ្រ​ចិន​ខាងកើត​។

ទាំងហ្វីលីពីន និងជប៉ុន ដែលជាសម្ព័ន្ធមិត្តអាស៊ីដ៏ជិតស្និទ្ធបំផុតរបស់សហរដ្ឋអាមេរិកទាំងពីរ បានប្រកាន់ខ្ជាប់នូវខ្សែបន្ទាត់ដ៏រឹងមាំប្រឆាំងនឹងអ្វីដែលពួកគេមើលឃើញថា ជាអាកប្បកិរិយាឈ្លានពានរបស់នាវាចិន ចំពេលមានជម្លោះដែលមានអាយុកាលរាប់ទសវត្សរ៍លើអធិបតេយ្យភាពដែនសមុទ្រ។

ក្រោមកិច្ចព្រមព្រៀងនេះ ប្រទេសជប៉ុននឹងផ្តល់ជំនួយឱ្យកងទ័ពជើងទឹកហ្វីលីពីន រួមមានកប៉ាល់ ប្រព័ន្ធរ៉ាដា និងឧបករណ៍យោធាផ្សេងទៀត ដើម្បីបង្កើនសមត្ថភាពការយល់ដឹងអំពីដែនសមុទ្ររបស់ខ្លួន។

ស្ថានទូតជប៉ុនប្រចាំទីក្រុងម៉ានីល បាននិយាយថា «គម្រោងនេះត្រូវបានគេរំពឹងថានឹងរួមចំណែកដល់ការរក្សា និងពង្រឹងសន្តិសុខក្នុងតំបន់ និងដើម្បីពង្រឹងសន្តិសុខនៃផ្លូវសមុទ្រដ៏សំខាន់ ហើយនឹងមានសារៈសំខាន់ចំពោះសន្តិសុខរបស់ប្រទេសជប៉ុន»។

ស្របពេលជាមួយគ្នា ក្រសួងការពារជាតិហ្វីលីពីនបាននិយាយនៅក្នុងសេចក្តីថ្លែងការណ៍មួយថា «កិច្ចសហប្រតិបត្តិការផ្នែកសន្តិសុខនេះ បានឆ្លុះបញ្ចាំងពីការប្តេជ្ញាចិត្តរួមគ្នារបស់ជប៉ុន និងហ្វីលីពីនចំពោះសន្តិភាព និងស្ថិរភាពក្នុងតំបន់»៕