ត្រាំ ព្រមានពីផលវិបាកធ្ងន់ធ្ងរ បើចំណាប់ខ្មាំងហ្កាហ្សា មិនត្រូវបានដោះលែង មុនថ្ងៃស្បថចូលកាន់តំណែង

ប្រភព៖ Reuters

វ៉ាស៊ីនតោន៖ ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានព្រមានពីផលវិបាកធ្ងន់ធ្ងរនៅក្នុងតំបន់មជ្ឈិមបូព៌ា ប្រសិនបើ ចំណាប់ខ្មាំងនៅក្នុងតំបន់ហ្កាហ្សា​ មិនត្រូវបានដោះលែងឱ្យមានសេរីភាព នៅមុនថ្ងៃទី២០ ខែមករា ដែលជាកាលបរិច្ឆេទស្បថចូលកាន់តំណែងជាប្រធានាធិបតីរបស់លោក ទេនោះ។

អំឡុងការវាយប្រហារលើអ៊ីស្រាអែល កាលពីខែតុលា ឆ្នាំ២០២៣ ក្រុមហាម៉ាសបានចាប់ខ្លួនមនុស្ស ២៥០នាក់ជាចំណាប់ខ្មាំង ក្នុងនោះរួមមានទាំងពលរដ្ឋអាមេរិកមានដើម កំណើតអ៊ីស្រាអែលផងដែរ។

ក្រុមហាម៉ាសបានទាមទារឱ្យបញ្ចប់សង្រ្គាម និងការដកកងទ័ពអ៊ីស្រាអែលទាំងស្រុងចេញពីហ្កាហ្សាជាលក្ខខណ្ឌនៃការដោះលែងចំណាប់ខ្មាំងនៅសេសសល់។ ប៉ុន្តែ នាយករដ្ឋមន្ត្រីអ៊ីស្រាអែល លោក Benjamin Netanyahu បានអះអាងថាសង្រ្គាមនឹងបន្ត រហូតទាល់តែក្រុមហាម៉ាសត្រូវបានកម្ទេច និងលែងអាចបង្កការគំរាមកំហែង ដល់អ៉ីស្រាអែលតទៅទៀត។

លោក ត្រាំ បានសរសេរនៅលើបណ្ដាញទំនាក់ទំនងសង្គមថា «ប្រសិនបើចំណាប់ខ្មាំងមិនត្រូវបានដោះលែង ឱ្យបានមុនថ្ងៃទី២០ ខែមករា ឆ្នាំ២០២៥ ជាកាលបរិច្ឆេទដែល ជាមហាកិត្តិយសសម្រាប់ខ្ញុំចូលកាន់តំណែងជាប្រធានាធិបតីរបស់សហរដ្ឋអាមេរិកទេ នោះវានឹងមានផលវិបាកយ៉ាងធ្ងន់ធ្ងរនៅក្នុងតំបន់មជ្ឈិមបូព៌ា និងចំពោះអ្នកដែល ទទួលខុសត្រូវប្រព្រឹត្តទង្វើឃោរឃៅទាំងនេះប្រឆាំងមនុស្សជាតិ»។

ក្រុមហាម៉ាស កាលពីថ្ងៃចន្ទ បាននិយាយថាចំណាប់ខ្មាំង ៣៣នាក់ នៅក្នុងតំបន់ហ្កាហ្សាត្រូវបានសម្លាប់នៅក្នុងសង្រ្គាមមានរយៈពេលជាង ១៤ខែមកនេះជាមួយអ៊ីស្រាអែល តែមិនបានបញ្ជាក់ពីសញ្ជាតិនៃចំណាប់ខ្មាំងដែលបានបាត់បង់ជីវិតទាំងនេះឡើយ៕