រដ្ឋមន្រ្តីការពារជាតិអាមេរិក៖ សហរដ្ឋអាមេរិកនឹងមិនបញ្ជូនកងទ័ពទៅអ៊ុយក្រែនឡើយ

 ប្រភព៖ Reuters

វ៉ាស៊ីនតោន៖ លោក Pete Hegseth រដ្ឋមន្រ្តីការពារជាតិអាមេរិក បាននិយាយថា រដ្ឋបាលលោកប្រធានាធិបតី ដូណាល់ ត្រាំ នឹងមិនបញ្ជូនកងទ័ពអាមេរិក ទៅកាន់អ៊ុយក្រែនឡើយ។

ការចេញមកបញ្ជាក់របស់លោក Hegseth បានកើតឡើង ចំពេលមានពិភាក្សាក្នុងចំណោមប្រទេសលោកខាងលិច អំពីលទ្ធភាពដាក់ពង្រាយកងកម្លាំងរក្សាសន្តិភាព ប្រសិនបើបទឈប់បាញ់មួយត្រូវបានលើកយកមកចរចា ជុំវិញសង្រ្គាមរុស្ស៉ី-អ៊ុយក្រែន។

ថ្លែងទៅកាន់ក្រុមអ្នកសារព័ត៌មាន នៅក្នុងប្រទេសអាល្លឺម៉ង់ លោក Hegseth ក៏បានឱ្យដឹងដែរថា លោកនឹងជំរុញឱ្យសម្ព័ន្ធមិត្តអឺរ៉ុប បង្កើនការចំណាយលើវិស័យការពារជាតិ នៅពេលដែលលោកជួបពួកគេក្នុងសប្តាហ៍នេះ។ លោក Hegseth គូសបញ្ជាក់ថា តំបន់អ៊ឺរ៉ុប មិនសមនឹងមានការឈ្លានពានណាមួយកើតឡើងទេ ប៉ុន្តែការវិនិយោគ ក៏គួរតែចំណាយលើវិស័យការពារជាតិឱ្យបានច្រើន​ ទាំងនៅក្នុងប្រទេសមួយ និងជាសមូហភាព៕