របបយោធាមីយ៉ាន់ម៉ា ប្រកាសបន្តភាពអាសន្នប្រទេស ៦ខែទៀត

 ប្រភព៖ Reuters

ណៃពិដោ៖ ប្រព័ន្ធផ្សព្វផ្សាយរដ្ឋបានរាយការណ៍ថា របបយោធាមីយ៉ាន់ម៉ា បានបន្តដាក់រដ្ឋក្នុងភាពអាសន្នរយៈពេល ៦ខែទៀត មួយថ្ងៃមុនខួប ៤ឆ្នាំ នៃរដ្ឋប្រហារឆ្នាំ ២០២១ ការណ៍នេះបង្ហាញពីការត្រៀមរៀបចំការបោះឆ្នោតដែលគ្រោងនឹងធ្វើឡើងនៅឆ្នាំនេះ បើទោះបីជាប្រទេសកំពុងស្ថិតក្នុង សង្គ្រាមស៊ីវិលក៏ដោយ។

ការបន្តដាក់ប្រទេសក្នុងភាពអាសន្ននេះ បង្ហាញពីភាពមិនប្រាកដប្រជា ក្នុងប្រទេសមីយ៉ាន់ម៉ា ខណៈ របបយោធាត្រៀមរៀបចំការបោះឆ្នោត ដែលគេមើលឃើញថា មិនស្របច្បាប់ ចំពេលមានវិបត្តិនយោបាយ និងសង្គ្រាមស៊ីវិល។

តាមការផ្សាយរបស់ MRTV ដែលគ្រប់គ្រងដោយរដ្ឋ បានគូសបញ្ជាក់ថា «នៅមានកិច្ចការជាច្រើនទៀតដែលត្រូវធ្វើ ដើម្បីរៀបចំការបោះឆ្នោតសកលដោយ ជោគជ័យ។ ជាពិសេសសម្រាប់ការបោះឆ្នោតដោយសេរី និងយុត្តិធម៌ ស្ថិរភាព និងសន្តិភាពនៅតែ ត្រូវការជាចាំបាច់»។

ទោះបីជាមិនទាន់កំណត់កាលបរិច្ឆេទជាក់លាក់ក៏ដោយ ក៏របបយោធានៅតែប្រកាន់ ខ្ជាប់នូវផែនការបោះឆ្នោត បើទោះបីជាមានការតស៊ូគ្រប់គ្រងប្រទេស និងប្រឈមមុខ នឹងការបះបោរប្រដាប់អាវុធក៏ដោយ។

អ្នករិះគន់បានចំអកឱ្យការបោះឆ្នោតនេះថាជា ការបោកប្រាស់ដើម្បីរក្សាក្រុមយោធា ឱ្យបន្តកាន់អំណាចតាមរយៈអ្នកតំណាង។ ក្រុមប្រឆាំងគ្រោងនឹងបង្អាក់សន្លឹកឆ្នោត និងបានជំរុញឱ្យបណ្តាប្រទេសនានាកុំទទួលស្គាល់លទ្ធផល៕